معلش يا جماعة ماهو ده العادى .

[محمود طربوش]

جى لسه طالع من بيتك فى الصبحية وبتقول
يافتاح يا عليم يارزاق يا كريم

تضرب عينيك يمين كده تبص تلاقى طابور العيش مش طابور ده طوابير

والناس بتتخانق ووصلوا للضرب كمان

تضرب كف على كف وتقول سبحان الله ايه اللى بيحصل فى البلد ده

وبعد كده تفتكر وتقول




أه صحيح ماهو ده العادى من بنك مصر





هوب تركب المواصلات من هنا وتقفل باب العربية من هنا يقولك ماتحسب ياريس براحة على الباب

تقول لمؤاخدة ياسطى معلش لسه نايم

يقولك ماشى يابا صباح الورد وتقولوا صباح الفل وتديلى الأجرة يقولك ايه يابا أنت اول مرة تركب معانا دى الأجرة بقت بجنيه

تقول سبحان الله أنا لسه راكب امبارح من هنا يقولك البنزين غلى يابيه

تقول صحيح هيه جات عليك ياسطى




وتفتكر وتقول أه صحيح ماهو ده العادى




تيجى نازل ولسه داخل على الشغل

ويشوفك المدير هوب أنت كل يوم متأخر 5 دقايق أنت امتى تظبط مواعيدك

معلش يافندم أنت عارف المواصلات

يقولك على مكتبك يافندى

وهو تلاقيه كل يوم جاى بعديها بساعة الا ربع الا يوم ضربت معاه وجاه بدرى شويه

وأنت رايح على مكانك وتقول




أه صحيح ماهو ده العادى




تيجى مروح وراكب المواصلات وتلاقى الطريق واقف أصلى المحافظ بيصلح الطريق

وتلاقى السواق بيسب ويلعن وتقوله مش كده ياسطى

يقولك اسطى ميين أنتوا خلتوها خل

وتقل صحيح أنا مالى أنا



ماهو ده العادى



تيجى داخل البيت تلاقى الجيران ماسكين فى بعضيها وهوب حدفوا بعض بالجرادل والمكانس

وشتيمة وقلة أدب


وتقول مش كده يا جدعان


ولا حياة لمن تنادى





وتقول أه صحيح ماهو ده العادى



تيجى خارج بالليل وتقول أقعد مع صحابى شويه ونطلع ع البحر كده بنتمشى

تلاقى البت قاعده مع الواد والبت ترقع ضحكة

هيهأ بس بصوت مجلجل كده




تقول انا لله وانا اليه راجعون




وتفتكر وتقول أه صحيح ماهو ده العادى




امتى بقى نعمل ثورة لانقلاب العادى ده عشان ميبقاش عادى

عايزين نفوق عايزين نصحى

عايزين صرخة


عايزين نعمل تعديل للمفاهيم ديه

ونقول لا مش عادى لا مش عادى لا مش عادى


وصحيح ايه اللى أنا بكتبه ده



معلش يا جماعة ماهو ده العادى .

[احمد مختار]

هو فعلا ده العادى
موضوعك جميل جدا

[اميره علي]

[align=center]موضوع جميل والله

فعلا في عندنا كتير لازم يتغير

اللهم أصلح أحوالنا يارب[/align]

[elnily]

عشان أنت مصري
عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف
(elnily)

[tota]

تسلم ايدك على الموضوع وعندك حق فى كل كلامك لان هو ده العادى فى حياتنا حاليا .....!
جزاك الله خير على الطرح.

[احمدخاطر]

شـكــ وبارك الله فيك ـــرا لك ... لك مني أجمل تحية .