حملة حقك من حقك .. الملف الأول .. حقوق الانسان .. الجزء الثاني..تصدق ان مفيش ؟؟

[خالد أدهم]

موضوع انهاردة هيكون طويل شوية يا جماعة ...
معلش بقى أصل بجد الكلام فيه مهم جدااااا ...
وبعدين مانتوا بقيلكم يومين مابتقروش حاجة اهو ..
انا طبعا في البداية باعتذرلكم جميعا ... للظروف اللى حصلت وخلتنا نتأخر في الحملة ...
بس ان شاء الله مفيش أي ظروف تانية تحصل ونكمل مع بعض لآخر الحملة ...
يلا نبتدي موضوع انهاردة ....
=======
أسئلة سريعة :
=======
تعرفوا في كام مصري عايش بره مصر ؟؟
طيب ياترى ايه حقوق المواطنين دول بره مصر ؟؟
ياترى مجرد ما خرجوا من مصر خلاص كده مابقاش لحد فيهم أي حق عند الدولة ؟؟
طيب لو حصلت أي مشكلة بره مصر لأي مواطن مصري يروح لمين ؟؟
=========
جوه الموضوع :
=========
زي ما قال آخر تقرير لوزارة الخارجية سنة 2008 ان عدد المصريين وصل لحوالى 6 مليون و700 الف مواطن , منهم هجرة دائمة ومنهم هجرة مؤقتة ..

طيب يعني ايه هجرة دائمة ويعني ايه هجرة مؤقتة ؟؟

بص يا سيدي الهجرة الدائمة دي يعني واحد مصري سافر بره مصر واشتغل في اي دولة وعاش هناك اكتر من 10 سنين أو أي مصري سافر بره وأخد جنسية الدولة اللي هو سافر لها ..
اما الهجرة المؤقتة دي يعني المصريين اللي عايشين بره مصر ونقل شغله هناك وقعد هناك حوالي سنة وبعدها نزل فترة مصر وقعد فيها مدة ماتقلش عن 6 شهور ورجع تاني وهكذا .. يعني مش عايش باستمرار بره مصر ..

طيب ياترى ايه حقوق الناس دي ؟؟

تقدروا تقولوا كده بكل بساطة الناس دى ملهاش حقوق دستورية عند مصر ..
تخيلوا ؟؟!!!
حد هيستغرب ويقولي ازاي يعني ؟؟ أقولك يا سيدي
تخيل ان الدستور المصري 211 مادة , مفيش ولا مادة فيهم اتكلمت عن حقوق المصريين في الخارج !!
لو جيت تبص على دستور أي بلد من البلاد اللي بتحترم شعبها وبتحافظ على كرامته على أرضها وبره أرضها , هتلاقي فيها مواد مختصة بده , زي عندك مثلا الدستور الروسي , وزي الدستور التركي , يا راجل ده دستور كازاخستان فيه مواد بتحافظ على حقوق الكازاخستانيين بره بلدهم !!

هتقولي امال السفارات والقنصليات والحاجات دي بتعمل ايه ؟؟

هاقولك انهم زي قلتهم ..
مفيش غير قانون اسمه قانون الهجرة ورعاية المصريين في الخارج رقمه 111 لسنة 1983
وكله مليان مواد ملهاش اي لزمة في الدنيا ..
يعني على سبيل المثال المادة 2 من القانون ده بتقولك ايه ..
بتقولك ان الدولة بتحافظ على كل المصريين بره مصر وبيحاولوا بكل الطرق ان المصريين بره مصر يكونوا على صلة بمصر كويسة ..

هتسألني سؤال وجيه وتقولي ازاي ؟؟

شوف بقى ياسيدي الوسايل بقى العبقرية اللى هم هيعملوا بيها كده ..
اول حاجة انهم يعملوا ندوات ومؤتمرات واجتماعات للمصريين اللى عايشين بره علشان يسمعوا مشكلاتهم ويحلوها ويقلولهم ايه اللى بيحصل في مصر أول بأول وياخدوا رأيهم فيه ... ياسلاااااام بجد عملوا اللى عليهم وزيادة
وطبعا هتقرا برضه شوية حاجات تنقط , من امثال , انشاء نوادي و روابط , ومنها ترشيح قنصل في كل بلد مسئول عن رعاية المصريين وطبعا ما حددوش ازاي المصريين دول هيتم رعايتهم ..
والغريب بقى ان الباب الرابع من القانون ده واللي مكتوب بقى عنوانه بالبنط العريض .. حقوق المهاجرين بالخارج ...
مفيهوش غير مادتين اتنين بس ... واحدة بتقولك ان المصريين اللى في الخارج من حقهم انهم ياخدوا اعفاء على الوادئع بتاعتهم في مصر ... والتانية تقولك من حقه انه يرجع وظيفته الحكومية لو كان قدم استقالته وسافر ورجع بعد سنتين وعاوز يرجع شغله ...
ومفيش ولا حاجة زيادة عن كده .. لا تقولي بقى لو حد اتعذب .. حد اتضرب .. حد مات ... ولا فيه أي حاجة من الكلام ده ..

============
حقك واللي من حقك :
============

طيب وبعدين ... ايه العمل .. المصريين بره مصر هيعملوا ايه لو حصلتلهم مشكلة ؟؟
طبعا لازم يحصل ضغط على الحكومة المصرية من المصريين في الخارج وحتى المصريين اللى جوه مصر ان يتعمل قانون خاص بحماية المصريين بره مصر وتتحط مادة في الدستور تحميهم ...
وطبعا انتوا عارفين اصلا ان احترام أي مصري بره مصر اساسه احترام دولته ليه ...
يعني لو المصري محترم في بلده ... أكيد هيحترموه بره مصر ...
ولو الناس اللى بيحكموا بلده كانوا ناس عندهم كرامة المصري من كرامة مصر بجد ... وأثبتوا ده للعالم بحاله بالفعل مش بس بالكلام... أكيد كل الدول هتحترمنا ..

بس هنقول برضه ان فيه حاجة مؤقتة لحد ما نحط ايدينا كلنا في ايد بعض علشان يكون فيه قانون لحماية كل مصري بره مصر ... بس باكرر دى حاجة مؤقتة ومش هتبقى قوية برضه زي قانون حماية المصريين في الخارج ..
طبعا بعد ما المصريين بره مصر ربنا .. ليهم حاجة اسمها العهد الدولي للحقوق المدنية والسياسية ... ودى اتفاقية دولية موقعة عليها مصر ... و موقعة عليها أغلب الدول في العالم ... والمفروض ان كل دولة موقعة عليها تلتزم بالنصوص اللى فيها ...

طيب الاتفاقية دي هتحمي المصري ازاي بره مصر ؟؟

شوف يا سيدي ... الاتفاقية دي بتقول ان لازم في أدولة من الدول اللى ماضيين على الاتفاقية انها تحمي أي مواطن لأي دولة تانية على أرضها وتوفرله الحماية من أي حد حتى لو كان حد له صفة رسمية .. وزير , رئيس وزراء , رئيس ... أيا كانت صفته الرسمية ...
وكمان مينفعش في أي دولة من الدول اللى ماضيين على الاتفاقية دي انه يتعذب أو يتعامل معاملة غير انسانية أو بتهين كرامته وده زي ما قالت المادة 7 من الاتفاقية دي ...
وبرضه بتقول ان ماينفعش حد يعتقل أو يتقبض عليه أو يتم اضطهاده او تعذيبه أو اهانة كرامته علشان جنسه او لونه او دينه أو جنسيته ...

طيب لو حد عمل حاجة والشرطة قبضت عليه واتهمته بحاجة ؟؟

لازم الاول الجهة اللى قبضت عليه دي ايا كانت شرطة او غيرها .. انها تقوله تهمته ايه , وانها ماينفعش تحتجزه ولازم تعرضه على النيابة في اسرع وقت والا تفرج عنه .. اما لو كان فيه كفالة فمن حقهم انهم يحتجزوه لحد ما الكفالة تندفع ..
ومن حقه كمان يجيبوله مترجم لو فيه صعوبة في فهم اللغة .. وطبعا المترجم ده مجاني ...
ومن حقه يطلب المحامي اللى هو عاوزه يدافع عنه أيا كانت جنسيته ...ولو ما يعرفش محامي أو ما معهوش فلوس علشان يوكل محامي ... من حقه انهم يجيبوله محامي يدافع عنه ...
من حقه ان محدش يعذبه أو ياخد ضده اى اجراء علشان يجبره انه يعترف على حاجة .. وله الحق انه ما يتكلمش الا في وجود المحامي بتاعه ...
ولو أي حد حصله حاجة ...سواء اعتقل أو اتقبض عليه أو اتعذب أو اتهان من حقه انه يرفع قضية وياخد تعويض كمان .. وده كله قالته المادة 9 والمادة 14 من الاتفاقية الدولية دي ...
وكمان الاتفاقية دي بتقول ان من حق أي مواطن انه يؤدي الشعائر الدينية بتاعته ويعبر عن فكره ورأيه وحريته في انه يتعلم دينه أو يمارسه على الملأ أو لوحده ..

وفي الآخر هارجع وأقولكم برضه احنا اللى مقصرين في حقنا وفى كرامتنا ... لو كنا دافعنا عن كرامتنا جوه مصر ما كانش حد اتجرأ وهانها بره مصر .... وكان المواطن المصري بره مصر الناس في كل دول العالم تحترمه ...
وبعدين ماحدش يقول ان الموضوع ده يخص المصريين بره مصر بس ...
طيب ما انت ممكن ياللى جوه مصر تسافر كمان شهر ولا شهرين ولا سنة ولا اتنين وتحصلك مشكلة بره مصر ... ساعتها مين هيحميك ...
كفاية سكوت بقى على اهانة كرامتنا ...
كفاية كل واحد يقول انا مالي بغيري ...
انهاردة غيرك من المصريين بيتهان ... انت بكره هتتهان