آه ياحكومه
 

آه يــا حكومه آه يــا حكومه
آه والآه مـــره ومكتومــــــه
قبــلك كنـــا مــن المحــدوده
بعدك صرنــا مـن المعدومـه
آه يــــاحكومه آه يــــاحكومه
آه يـاحكومه اسم الله عليكــى
ألف سلامـــــه لننى عنيكــى
ياللى خلعتى وشيلتى ايديكى
ياللى دخلتى ف سابع نومـه
آه يــــاحكومه آه يـــاحكومه
أمـا حكومــه صحيح شغالـه
سايبه شارعنا ف أحسن حاله
ألف مطب وطــــن زبــــــاله
فوضى بـايد فنــان مرسومـه
آه يــــا حكومه آه يـــاحكومه
مين ع الشعب المليـان طيبـه
دعـــا ربنا يرميه ف مصيبه
ويــــوقعه فى ايـديـن هليبــه
تبقى نصيبه وليـه مقسومــــه
آه يـــا حكومه آه يـــا حكومه
مـــن نــوابك شوفنــا نـوايب
مــــن أفعالك قلنــا عجـــايب
م المضروب ح تلمى ضرايب
بــايخه النكته ومش مفهومــه
آه يـــا حكومه آه يـــا حكومه
روحتى وبعتى الغاز بخساره
ولمين بعتى لأوسخ جـــــاره
ليــه وازاى وبـــأى أمـــاره
تاخدى بتمنه بــذور مسمومه
آه يـــا حكومه آه يـــا حكومه
علـى مـايشرع سيدنا الشارع
العيـان رميتيه فــــى الشارع
والغلبـان فـــى الفقر يصارع
وانتى تباتـــى الليل متخومـه
آه يـــا حكومه آه يــا حكومه
وبيــوت سيبتى الناس تبنيها
بــاعت قوتها وسكنت فيــها
وأمـــــا سألنــا ليــه تهــديــها
قلتى الرخصه ماهش مختومه
آه يـــا حكومه آه يـــا حكومه
كــله بيكتب ومفيش قــــارى
مـــانتى رشيده وجنسك آرى
كلنا حمير وشربنــا مجــارى
ومفيش مـــره تلبى عزومـــه
آه يـــا حكومه آه يـــا حكومه
وعشان وشك حلـــــو علينــا
بنسيب أزمــــه التانيه تجينــا
ايــــــه بتخبى الأيـــــام لينـــا
كــــوكتيل فيرس أو جرثومه
آه يـــا حكومه آه يـــا حكومه
حظك كدا يـــا حكومـه معانا
واحنــا تملى بنرمى بـــــلانا
ايـــــه تعملى والمولى ادانــا
عين بصاصه وايد مخرومه

لو هتتذكر الحكومه ...سوف تتذكر الاف الاهات ..............!

كلماتك جميلة ومعبرة
لنا الله سبحانه وتعالى