بنات فوق الثلاثين.. فتيات يكافحن «الوسادة الخالية»

[احمد مختار]

بنات فوق الثلاثين.. فتيات يكافحن «الوسادة الخالية»

أعد الملف رحاب حسنين 15/ 2/ 2010
«عوانس».. هكذا يسميهن مجتمع يضعهن تحت الميكروسكوب ويعد عليهن أنفاسهن لمجرد أنهن تخطين السن الطبيعية للزواج.. النظرات غير المريحة تحاصرهن.. والعروض «الغريبة» للزواج تنهال عليهن، إما من رجل متزوج أو أرمل غزا الشعر شيبه أو طامع فيهن. الظاهرة ليست جديدة على المجتمع المصرى لكن معدلاتها المتزايدة يوماً بعد يوم، تكشف عن أن شيئاً ما «غلط» يجب الانتباه إليه، بعيداً عن دراسات الغرف المغلقة والمكاتب المكيفة والتنظير الأكاديمى، خاصة بعد أن وصل عددهن إلى أكثر من 12 مليون فتاة. من المسؤول؟!..

سؤال صعب يبحث عن إجابة ويجر خلفه عدة علامات استفهام وتعجب، خاصة أن بعض الفتيات اللاتى تخطين سن الزواج يفضلن نار العنوسة ولا ضل الرجل، خشية الوقوع فى مصيدة «سى السيد» أو من لا يرحم. المثير أن ملايين من هؤلاء الفتيات رفضن عدة عروض للزواج، قد تكون بينها زيجات «لقطة» فى بعض الأوقات، لأسباب تختلف من واحدة إلى أخرى، وبعضهن تمت خطبتهن أكثر من مرة، وتكون نهايتها الفسخ إما لأسباب اقتصادية أو لدواع أخلاقية.

والأكثر إثارة هو أن معظم «العوانس» من المتعلمات الحاصلات على أعلى الدرجات العلمية، فمنهن الطبيبة والمهندسة والحاصلة على الماجستير والدكتوراه، إلى جانب أن مئات الآلاف منهن يعشن حياة اجتماعية مرفهة. والغريب أن الارتفاع المتزايد لأعداد الفتيات، اللاتى تجاوزن الثلاثين دون زواج، كان وراء عودة الخاطبة لكن فى شكل عصرى، وازدادت مكاتب الزواج بالكمبيوتر ومواقع الزواج على الإنترنت، وتعرضت مئات الفتيات لعمليات «نصب» واسعة، أثناء رحلة بحثهن عن زوج.

«العدل» و«الوليف» و«السند» و«الستر» و«النص التانى» عبارات تتردد خفيفة، بهمس تجنبا للعقوبات الاجتماعية. نحو 13 مليون فتاة مصرية تجاوزت الثلاثين دون زواج، هذا ما تقوله إحصائيات رسمية ودراسات اجتماعية، 13 مليوناً يزدن أحيانا ويقللن أحيانا أخرى حسب اتجاه الريح. بنات «زى الورد» تجاوزن «الخط الأحمر» من وجهة نظر المجتمع على الأقل، تخطاهن قطار الزواج بعد أن وصلت إلى الثلاثين «الحد الاجتماعى للعنوسة».

فى كل مكان تسمع بنت الثلاثين «نصائح» للوصول لـ«القفص الذهبى» وترى نظرات تمزج بين الشفقة والشماتة، فى كل مكان تسمع الثلاثينية الشابة همسا عن «العيب» غير المفهوم لتبدأ ماكينة المجتمع فى «طحن» البنت كأنها المسؤولة عن كل هذه الوحدة. فى هذا الملف، تسأل «المصرى اليوم» فتيات تجاوزن الثلاثين، تسأل عن «الونس» و«فارس الأحلام».. تتبع «الوصفات» وترصد ماكينة «الطحن الاجتماعى».. فى هذا الملف تفتح «المصرى اليوم» نافذة على عالم آخر يمتلئ بالسرية والوحدة والقسمة التى غالبا بلا نصيب.

الإحصائيات تتحدث عن 30% من فتيات مصر تجاوزن الثلاثين دون وجود زواج، فى الإحصائيات أيضا تبدو الظاهرة أكثر انتشارا فى الحضر منها فى الريف، حيث تبلغ النسبة 38% مقابل 30% فى الريف، وفى تقسيم آخر تصل معدلات العنوسة فى محافظات الوجه البحرى إلى 27% فى المتوسط، فيما تصل إلى 25% فى المتوسط فى محافظات الوجه القبلى. فى السطور التالية تحكى فتيات فوق الثلاثين عن تجاربهن الشخصية، أردن الابتعاد عن خطوط المجتمع الحمراء فرفضن نشر أسمائهن، ووافقن على نشر السن فقط كى يعرف المجتمع إلى أين تسير به معدلات «القسمة والنصيب».

«الاسم (ع. م) السن 42 سنة و(وشوية فكة) الوظيفة طبيبة، الحالة الاجتماعية عزباء بلا سبب»، هكذا بدأت أولى الحكايات، فتاة جميلة رغم تقدم العمر، حصلت على بكالوريوس الطب بتفوق، ورأت أن الماجيستير هو الخطوة الثانية «بعد التخرج كان كل أملى آخد ماستر بمرتبة شرف، كان تفكيرى كله فى الدراسة» فى فترة الماجيستير تعرفت الطبيبة الشابة على «إشارات العنوسة» كانت تحضر حفلات زفاف وخطبة الصديقات، وبدا كأنها الوحيدة التى لم تركب القطار المتجه إلى «عش الزوجية».

الطبيبة ابنة لأسرة متوسطة تعتبر التعلم السند الوحيد. تقول الطبيبة: «فضلت كدا شوية، وبدأ الخطاب يجيوا، بصراحة جالى عدد كويس، لحد ما اتخطبت لواحد فترة بسيطة وبدأت المشاكل.. غيرة وتضييق وأوامر وتعامل غريب جدا على تفكيرى.. كان بيرفض عقلى وبيغير حتى من نفسه وبدون أسباب طبعا كان فيه خلاف فكرى كبير بينا». كان العريس الغيور «سى السيد» بقميص وبنطلون، وكانت الطبيبة تحاول الموازنة بين «عقلها» وشبح العنوسة حتى وقع الانفصال.

«بعدها ركزت بقى فى شغلى ودراستى، كنت بحس بالوحدة دا حقيقى.. لكن كل شىء نصيب.. فى البداية كانت الوحدة مرعبة ودخلت فى نوبة اكتئاب طويلة استمرت سنين.. بس دلوقتى خلاص، بعد السن دا لقيت فى نفسى حالة رضا وقلت دا قدر ربنا».

سافرت الطبيبة إلى السعودية، لتجد نفسها أمام نوع جديد من الخطاب «اتعرض على مشاريع جواز كتير، بس كنت برفضها.. كانت فاشلة من بدايتها.. لقيت شباب مش قادر يتجوز بيخبط على بابى، وجانى خطاب من جنسيات أخرى لكنى رفضت النوعين دول رفض قاطع.. أنا عاوزة راجل خلوق وصادق ومتعلم وعنده وفاء.. والرجالة إللى من النوع ده بقوا إبرة فى كومة قش.. آه الكمال لله وحده وآه أنا ممكن أتنازل شوية لكن مثلا مش هاروح أتجوز أى واحد وخلاص».

تعيش الطبيبة الآن حالة غريبة من التوازن « طبعا بتضايق من نظرة الناس لى على أنى عانس والهمس إن أكيد فيه عيب أو عندى مشكلة أخلاقية لكن أنا اتعودت أرمى كل الكلام الفارغ دا ورا ضهرى وبحاول أعيش فى سلام مع نفسى».

فى أسرة متوسطة بمحافظة الدقهلية نشأت، حصلت على مؤهل متوسط لتعود بعد المدرسة إلى «غرفة الضيوف» فى انتظار الونس. (ن.ع) تجاوزت خط الثلاثين الأحمر بعام واحد، فى مجتمع ريفى تصبح الفتاة فيه عانسا إن لم تتزوج بعد الجامعة بعامين «أنا قاعدة فى البيت من خمس سنين، اشتغلت شوية فى حاجات مختلفة كلها حاجات وأنشطة اجتماعية، بعد كدا قعدت واتخطبت فعلا». خطيب (ن.ع) كان نوعا من «الستر» المفروض بحكم السن والعائلة «كان قريبى والارتباط كان شكلى تماما عشان منظرنا قدام الناس بدل ما يقولوا على عنست، ما قدردتش أحس معاه بأى حاجة لا أمان ولا ونس.. وانتهت القصة بالانفصال».

تضيف (ن.ع) «ناس كتير اتقدمت لى بعد الخطوبة الأولى، كلهم من طراز سى السيد، ولا واحد فيهم احترم عقلى ولا حسسنى بالأمان.. وأنا لسه متمسكة بمطالبى لأنى شايفها محدودة جدا.. محتاجة بس راجل يفهمنى ويحسسنى بالأمان ويكون فيه بينا لغة مشتركة» انفعالات (ن.ع) لا تلبث أن تهدأ قليلا حين تحكى عن السن. «ساعات بحس بالخوف من بكرة وبتخنق.. العمر بيجرى والناس ما بترحمش ونظرات الشفقة وكلام النميمة بيخلينى أتحسر على حالى.. المجتمع بيحملنا فوق طاقتنا.. وأنا مش عارفة هافضل كدا لحد امتى بعد تأخر النصيب.. للصبر حدود بردو».

حل مبتكر فكرت فيه (ن.ع) لم يكن الحل يكمن فى «حجاب المحبة» أو نصائح العجائز أو حتى اللجوء إلى الخاطبة. فكرت (ن.ع) فى إنشاء رابطة تحت مسمى «بنات فوق الثلاثين» الرابطة تضم حاليا عشرات الفتيات، والهدف الوحيد «مساعدة البنات فى الجواز سواء بقى كان المانع حاجة اقتصادية أو اجتماعية..

الفكرة كلها إننا نحاول نساعد بعض». الاستجابة لفكرة الرابطة بدأ ضعيفا، كان الخوف من الاعتراف بتأخر سن الزواج وفوبيا «كلام الناس» يجعلان العضوية مغامرة غير محسوبة جيدا.

«بنات كتير وافقوا بس قليلين اللى اشتركوا فعلا.. كانوا خايفين من البيوت والفضيحة.. بس أنا متفائلة وهافضل ورا الرابطة لحد ما يبقى فيه حل وبحاول دلوقتى أعمل اتصالات مع منظمات حقوق الإنسان والجمعيات النسائية وحتى رجال الأعمال عشان نعرف نلاقى حل للمشكلة دى».

[tota]

جزاك الله خير على طرح موضوعك لك منى ارق تحيه .

[reham]

شـكــ وبارك الله فيك ـــرا لك ... لك مني أجمل تحية .

[على الشامى]

موضوع العنوسه دة اصبح مشكله ولديها اسباب من اهمها الزيادة الهائله والرهيبه والاسعار المرتفعه في كل شيء وعدم قدرة الشاب او الشابه على تجهيز نفسهم والخ

[منى]

[align=center]العنوسة مش فى البنات بس دية فى الشباب كمان وكله على الله عز وجل اللى مكتوب لية الجواز سوف يتزوج واللى مش مكتوب نصيبه فى الاخره[/align]

[احمد مختار]

المشاركة الأصلية كتبت بواسطة tota

جزاك الله خير على طرح موضوعك لك منى ارق تحيه .

وجزاكى خير الجزاء
مشكورة على ردك

[احمد مختار]

المشاركة الأصلية كتبت بواسطة reham

شـكــ وبارك الله فيك ـــرا لك ... لك مني أجمل تحية .

مشكورة ريهام

[احمد مختار]

المشاركة الأصلية كتبت بواسطة على الشامى

موضوع العنوسه دة اصبح مشكله ولديها اسباب من اهمها الزيادة الهائله والرهيبه والاسعار المرتفعه في كل شيء وعدم قدرة الشاب او الشابه على تجهيز نفسهم والخ

فعلا يا على عندك حق
المغالاة فى كل شى

[احمد مختار]

المشاركة الأصلية كتبت بواسطة منى

[align=center]العنوسة مش فى البنات بس دية فى الشباب كمان وكله على الله عز وجل اللى مكتوب لية الجواز سوف يتزوج واللى مش مكتوب نصيبه فى الاخره[/align]

فعلا يامنى عندق حق
كل شى فى الدنيا نصيب
بس احنا بنطرح بس الاسباب اللى ادت لكدا

[شيرين]

السلام عليكم ورحمة الله وبركاتو موضوع مهم جدا جدا احتمال كل واحد بيكون بيمر بالظروف دى انا حقول عن تجربة ليا شخصيا واعرفكم اد اى الشباب تافهة للاسف وانا اسفة لكل الشباب الموجدين بس مش كل الشباب بتفكر كدة ولا حتفكر كدة انا كمان اتعرضت للموضوع دة جالى عريس هو مسافر برة مصر واحدة اربتو هيا الة مرشحاني لية لانها عارفاني المهم تخيلو هو طلباتو اى اى الة ممكن شاب يطلبو في شريكة حياتو
تخيلو لما جة على شان يشفني كان اول كلمة يقلها انا عايذ تكون بيضاء لدرجة من كتر بيضها ؟؟؟ وكمان تكون طويلة وعنيها خضراء وشعرها واعد يكلم اكنو حيشترى ؟؟؟ مفكرش انها تكون محترمة مفكرش انها تكون محجبة ملتزمة كل التفكير في كدة انا لما سمعت كدة رفت ادخل اشوفو لانو قليل الزوق وعارفين قال اى انا بفلوسي اجيب اى حد هيا دى نوعية الشباب المحترمة عرفتو لية ان العنوسة انتشرت لان الشباب مستهترة ومش بتخاف ربنا باذات النوعية الة بتسافر برة انا اسفة لكل الشباب على الكلام دة بس انا قالت مش كل الشباب طبعا فية الحلو وفية الوحش زاى البنت فية الحلو وفية الوحش واكيد ربنا شايل لينا الخير اكيد ربنا لية حكمة في كدة لان نسبة الطلاق كبيرة جدا دة برضو موضوع مهم جدا للغاية مش العنوسة بس البنت افضل لها تكون بنت ولا تكون مطلقة
وربنا يحمينا من كل شر ويحمي كل بنت امين يارب العالمين ويرزق كل بنات المسلمين بالزوج الصالح امين يارب العالمين يارب سترك وعفوك ورضاك
شـكــ وبارك الله فيك ـــرا لك ... لك مني أجمل تحية .