وليد الوصيف يكتب: ادعيلى أموت

[reham]

وليد الوصيف يكتب: ادعيلى أموت

ادعيلى يا أمى بالحصانة
بكرسى أوصافه العمر الطويل والمتانة
ادعيلى بصدق وكل أمانه
أبقى حوت تحت قبة الخيانة
وأنت يا أبويا بما إنك ترزى
فصلى حصانة فصلى كرسى
يكون فيهم كل الخير
لأهلى وديرتى وبلدى
يمكن أقدر يوم أغير
أو أحارب كل خاين
ولا أنت خايف يوم أتغير
وأبقى فاسد وأبقى خاين
وفى الحقيقة يكون عندك حق
أصل الأخلاق والضمير فى أذمة
وأى عضو يقول يوم لا
فى الدورة الجديدة ما ببالوش لازمة
ويجهزوا له ألف مليون مطب
خاين وعميل ومش وطنى
والحكومة عايزه مصلحة الشعب
والمصلحة أكيد فى الكرسى الوطنى
كرسى شعاره فيد واستفيد
أخد كل حاجة واديك ملعقة


وإن زعلت أعملك قانون جديد
يلف حولين رقبتك حبل المشنقة
كرسى لذيذ العضو فيه مطاطى
المهم كم توقيع بحبة أراضى
والحكومة عايزة عضو مطبلاتى
فى كل برنامج يهتف ويهاتى
وبصرحه أنا مقدرش أكون
واحد متحصن زى دول
وحسابى فى البنك يزيد بجنون
وابن بلدى لا لاقى عدس ولا لاقى فول
ادعيلى يا أمى بالحصانة
ولا أقولك ادعيلى أموت
لأن الحصانة لابن الناس إهانة
والموت أهون م السكوت
وما فيش قانون ينصف فقير
وما فيش حرامى مقدرش يطير
وما فيش صندوق من غير تزوير
وأبويا ترزى مش وزير
منقول