روح الشهيد

[سامى النويهى]

روح الشهيد روح الوطــــــــن
حضن الــــــوطن روح الشهيد
دم الشهيـــــــــد هـــــــو التمن
علشان وطـــن حــــــر ومجيد

روح الشهيد ساعـــــــة الأدان
تطلع تـــــرفــــرف ع الميدان
وتقول هنــــا نـــــــولت المنى
وفرحت بــــــالنصر اللى كان

روح الشهيد بتقول يـــــامصر
أنـا حبى ليكى مالوهش حصر
أنـــــا ليا فيكى يــامصر نصر
وليا فوق فــــــــى الجنة قصر

دى الـــــــــروح هناك متنعمة
وبتيجى مــــــن سابــــــع سما
تـــــــــرمى السلام ع الطيبين
وبتدعــــى بــــــــالخير والنما

قـــــــالوا الشهيد رغـــم الألم
لحظة مــا مــــــات ليه أبتسم
أصل الشهيد شاف مـــن بعيد
للجنـــــــة سكـــــــــة بتترسم

أم الشهيد خــــــــــــــالد سعيد
شافت ضناها فـــــــــى المنام
لابس حــــرير والتوب جـديد
فارس وماسك فـــــــى اللجام

شافت كمان ضحكة ف عينيه
بتقول يـــــــاأمى الحــزن ليه
أنـــــا واللـــى زيى استشهدوا
فــــــى نعيم ياريتك كنتى فيه

أمى افرحـــــى داأنا مطرحى
ماخطرش علــــــى بال العباد
واول يــــــاأمى مـــا تصبحى
قومى اخلعى تـــــــوب الحداد

ومــــــن النهارده دموع مفيش
وان جابوا سيرتى ما تزعليش
وان مصر عازت حـــــد تانى
علــــيها يــــــــــامّه ماتبخليش

يــــــاام الشهيد خــــــالد سعيد
خـــــــالد أكيد وهنــــاك سعيد
وأنتــــى أمنـــا وأحنـــا هنـــا
بقـــــــى كلنا خـــــــــالد سعيد