جرى ايه باااا حكومة و ياااا مجلس عسكري مرعب

[hisham tohami]

جرى ايه ياااا حكومة و ياااا مجلس عسكري مرعب جيوش الاعداء . شوية جهلة على شوية بلطجية خونة مدسوسين لتشويه صورة مصر بيعرضوا للعالم حالة التسيب في بلدنا .. مش قادرين توقفوهم عند حدهم و سايبنهم كل شوية يتجمهرولنا في حته شكل يطلبوا حاجة جديدة و يوقفوا حال البلد و الحكومة تقولهم حاضر .... يا بتوع الثورة يا وطنيين ... عاوزين كمان توزعوا كروت دعوة على دول العالم الي عايز يدوس على كرامة مصر و اهلها .. وزعوا.. ما هي البلد اصبحت وكالة من غير بواب و أهي حاجة نملئ بها الفنادق الفاضية و ننعش بها السياحة و ناكل منها عيش . قد ايه انتم وطنيين و بتحبوا بلدكم و خايفيين على شعبها الغلبان .
الواحد يقول ايه ... مادام مش قد الثورة ما كنتم تسيبوا الشباب الراقي الي قام بيها يكمل مشواره الذي بدأه و قدم دمه ثمن لها بدل ما تبدلوهم بشوية جهلة بلطجية عاملين فيها ثوار و يخربوا البلد و يخربو بيوتنا . انتم فاكرين الحكاية لعبة ده لسة امامنا ايام سودة طول ما احنا قعدين نولول زي النسوان .. لسة لما تدخل القاعدة البلد وتعشش فيها مثل افغانستان و لسة لما الجماعات الاسلامية تدخل في خلافات فيما بينهم و يقتلوا في بعض وفي الشعب و لسة لما دول اوربا تتدخل تحت شعار انقاذ الاقلية المسيحية و لسة لما ايران تدخل تنشر فكرها الشيعي و تعمل فينا مثل ما فعلت في العراق و لسة لما اسرائيل و حماس يتخانقوا على سيناء و احنا بنتفرج . و ربنا ستر ان القذافي مشغول عنا بشعبه و إلا كان زمانه وسطنا الان . و الله اعلم الايام جايبه معاها ايه.. لشعب غلبان .. بنصدق اي حاجه و مش فاهمين اي حاجه و نهتف و نصفق و نرقص على اي حاجه و مبقناش نساوي اي حاجه .. يا خسارتك يا مصر يا ام الدنيا .. شعبك خزلك .