عرض مشاركة واحدة
قديم 03-17-2011, 07:50 PM   رقم المشاركة : [9]
مصري قديم
عضو
 
افتراضي

ولسه بيحصل في مصر
القومسيون الطبي لسيارات المع
اقين
- هل أنت معاق ومن ذوي الاحتياجات الخاصة
- هل ربنا كرمك بقرشين وقررت انك تحاول أن تعيش حياتك مثل أي إنسان طبيعي وتشتري سيارة مجهزة طبيا للمعاقين
إذا أنت مدعو معنا إلي رحلة إلي القومسيون الطبي للمعاقين والكائن في شارع مجلس الشعب خلف مبني وزارة الصحة
1- في البداية تستقبلك موظفة استلام الأوراق بطلبات من عينة اشتري ملف وصور لي الورقة دي 5 صور والحاجات البسيطة دي وهذه أشياء عاديه
ولكن الغير عادي تري أنها تشخط وتنطر وتتأمر وكأنك حرامي هتهبر لك هبرة من مليارات الدولة اللي راحت ...ولا داخل تقلبها وتاخد منها القرشينات وحتتين الدهب اللي حيلتها... ويمكن تكون فكرت انك انت اللي سرقت المتحف المصري... المهم معاملة في منتهي الاهانة والاستعلاء وكأنك شحات تلم وبلط ودمك يلطش وريحتك معفنة رغم ان عدد الحالات اليومي لا يتجاوز في اقصي الاحوال 15 حاله
بعد كده تدفع الرسوم ويتحدد لك جلسة للكشف بمستشفي المنيرة علي يومين يوم نظر ويوم عظام ( ولك يوم يا ظالم باللي في بالي )
2- تروح مستشفي المنيرة ومش هنقول الحقيرة علي رأي الأخ مرتضي منصور لما كان بيقول الجزيرة الحقيرة ...ما علينا المهم هتلاقي في أول يوم كشف النظر والجماعة بتوع الرمد الشهادة لله بالفعل ناس محترمين ومعاملتهم طبيعة وتعتبر ملائكية بالنسبة للي بعده... لكن ثاني يوم هتشوف حاجات ...مش هتقدر تغمض عنبك
يقولوا لك لازم تكون هناك الساعة 9 صباح وتسعه وخمسه مينفعش تروح في الميعاد يا حبة عيني وتفضل قاعد قاعد لغاية لما جناب الدكتورة توصل عشرة أو عشرة ونص
المهم بعد ما توصل ويشربوا الشاي تلاقي شحط خرج وفي أيده ملفات ويطرد الناس خارج المبني في الفسحة اللي أمام المبني وللعلم إحنا بنتكلم علي ناس معاقين يعني فيهم اللي مبيعرفش يقف واللي مبيعرفش يمشي ولا حتي يقعد والأخ الشحط ده يرص البشر كل واحد حسب دوره كأنهم داخلين في طابور الجمعية ويطلق بصوت حنجوري ( كل واحد يقلع جزمته وشرابه ويشمر بنطلونه) طبعا في ستات دي بس للعلم إن اللي يكشفوا رجال وسيدات وكله هيشمر يا معلم
يمكن هيلعبوا ماتش كوره شراب ولا رايحين الغيط يسقوا الزرع ..!
3- بعد كده ربنا يكرمك وتدخل الكشف هتلاقي دكتورة ظريفة وصغيرة ( يعني خبرتها... دو... يك ) قاعدة علي المكتب وتبدأ الكشف وهي بالصلاة علي النبي قاعدة علي المكتب قرفانه يا ولداه من الاشكال اللي داخله عليها وتبدأ الكشف وتقول روح ..تعالي , ارفع رجلك.. نزل رجلك , حرك صوابعك وفتح عينك تاكل ملبن ( طبعا مقصدش اللي في بالك رشاوي ولاحاجه وحشه لا سمح الله ) لكن كأنك في سيرك الحلو وبيستعرضوا حيوان جاي من مجاهل افريقيا ولا حيوان من العصر الأنوي علي رأي الراحل يوسف بك وهبي في فيلم شنبو في المصيدة
واسألوا الطبيبة المختصة بالكشف في اللجنة الطبية جلسة يوم 12 / 1 / 2011 بمستشفي المنيرة
لأن العبد لله يعتقد المفروض الطبيب يكشف ويري الحالة ويطلب إشاعات أو يعمل مقاسات لطول وأقطار القدمين أو يحيل إلي قسم الاشعه لإجراء الفحص اللازم
مش كده ولا أيه ولا يمكن الطب أتغير وبقي بالفهلوة زي زمان صاحبنا اللي راح في 11فبراير
4- ويقولوا لك النتيجة هتظهر بعد شهرين ومعرفش ليه شهرين بس ممكن احتمال عشان الكنترول ودرجات الرأفة للي بالي بالك ولا يمكن عشان يجمعوا درجات ملف الانجاز
5- المهم بعد شهرين ترجع لمقر القومسيون اللي في وزارة الصحة تلاقي نفسك غير مستحق رغم حالات مماثلة لحالتك أو حالات درجة إعاقتها اكبر أو اقل من حالتك استحقت رغم انك أنت معين ضمن نسبة 5% الخاصة بالمعاقين في الحكومة واتهريت كشف طبي في القومسيون في بلدك بمعرفة خبراء وأساتذة كبار جدا بالمقارنة بالمفعوصة اللي في مستشفي المنيرة اللي شافتك متسول وجاي تنصب عليها رغم انك انت ممكن تكون مهندس أو محاسب أو محامي

يبقي أنت أكيد أكيد في مصر


مصري قديم غير متواجد حالياً   رد مع اقتباس