عشان انت مصرى
http:///www.elaph.com/elaphweb/Resou...%AD%D9%8A2.jpg
عشان انت مصرى لازم تعانى وتفقد كرامتك بكل المعانى وتحرق فى دمك سنين مش ثوانى واوعى تصدق كلام الاغانى بتاع الحضاره وكانى ومانى ده كله هجايص مايدخل ودانى عشان انت مصرى العذاب بيناديك بتبدا فى يومك حاجات بترازيك فى نومك فى قومك تعكنن عليك تضايقك ولسه العماص فى عينيك مافيش ميه تشطف صابونه فى ايديك وجسمك ملزق وريحتك عاديك فتلبس وتنزل وفيك اللى فيك ورايح لشغلك حتحتاج مواصله ادى المترو واقف وكهربته فاصله وفى الميكروباص خناقه وحاصله اوتوبيس فرامله عايزالها وصله وتوك توك ده تايه ومحتاج لبوصله بتوصل لشغلك بدم اتحرق فى زحمه وكتمه وحر وعرق رئيسك سايبلك كومه ورق ده غير دمغه ضايعه وملف اتسرق وفى كام مواطن عامللك قلق بيشكى تقول له روح اندعق وعركه وهوجه وشاى اندلق ومخك خلاص من الصداع اتفلق هترجع لبيتك ده لو كان فى بيت هتوصل هتندم ياريتك ماجيت مراتك بتصرخ خلاص استويت عيالك بتطلب وهات كيت وكيت تزعق تهاتى ياناس اتهريت ولاحد سامعك مهما هاتيت عشان انت مصرى وده للاسف فلازم تاسى تعيش تتقرف وكل الاساسى فى حياتك ترف فتنسى الكرامه وتنسى الشرف وتسرق وتنصب او تنحرف ودمعك بيجرى وجرحك نزف مش انت اللى مصرى؟؟؟ احمد فؤاد نجم |
والله كلمات جميله جدا جدا وفعلا دى الحقيقه بس اصلنا بقى يخاف الاغلبيه والكل بقى يخاف يتكلم
اجعل كلامنا خفيف يارب عليهم افوض امرى لله احلى واطيب بس والله اللكلام جميل جدا جزاك المولى خير خير الجزاء |
الساعة الآن 02:34 PM. |
Powered by vBulletin® Version 3.8.12 by vBS
Copyright ©2000 - 2024, Jelsoft Enterprises Ltd.
جميع المشاركات والمواضيع بالمنتدى تعبر عن وجهة نظر كاتبها ولا تعبر بالضرورة عن وجهه نظر الموقع
الموقع برعاية الشركة المصرية لتطبيقات الانترنت