اشرب وانسى ورشح نفسك
نفسى فى صنف حشيش ينمل الدماغ وينضف النخاشيش علشان انسى طابور العيش واخش فى الغيبوبه وانسى مشكلة الانبوبه وانسى بلدنا المنهوبه وابقى مسطول وانسى اى مسئول من اللى سابوا الناس فى السيول وانسى ان ؟؟؟؟؟ اتجوز وبقى بيعول وانسى مجلس الشعب و؟؟؟ وانسى البرادعى وايمن نور وانسى شوبير ومرتضى منصور وانسى تعديل الدستور وانسى اللى ساكنين فى القبور وانسى انفلونزا الطيور وانسى مشاريعنا الفاشله فى توشكى وابو طرطور واخش فى الاستهبال وانسى التوريث و النيل اللى نازلين فيه تلويث وانسى ان منتخبنا كويس واللى حصل فى السودان وانسى تصدير الغاز واحناعندنا ازمة بوتاجاز وانسى الاضطهاد واللى بيحصل للاقباط وانسى قطر العياط وانسى قطر الصعيد وانسى احمد عز واحتكار الحديد وانسى زحمة المواصلات وانسى الانتخابات وانسى فتاوى الفضائيات وانسى العشوائيات وانسى فشل التعليم وانسى هشام طلعت وسوزان تميم وانسى الاهرام وانسى الاخبار وانسى انه خلى بلدنا افقر من زنزبار وانسى المعارضه وانسى الاحزاب وانسى تامر حسنى وعمر دياب وانسى مشكلة النقاب وانسى ارضاع الكبير وشرب بول البعير وانسى انفلونزا الخنازير وانسى اوربا وامريكا وانسى الصين المتقدمين عننا بسنين وانسى البيت بيتك و تامر امين وانسى ان كيلو اللحمه بقى بتمانين وانسى اننا فى الزباله غرقانين وانسى الماده سته وسبعين والماده سبعه وسبعين وانسى فريق الساجدين وانسى الزمالك والاهلى وانسى اليسا وهيفاء وهبى وانسى الفول والطعميه وازهى عصور الديموقراطيه وجامعة الدول العربيه والجماهيريه الليبيه والكفيل فى السعوديه وانسى بطرس غالى و الضريبه العقاريه وانسى الطلعه الاولى الجويه والمصالحه الفلسطينيه وانسى فتح وانسى حماس وانسى هنيه ومحمود عباس وانسى العراق وافغانستان وانسى ايران و انسى باكستان وانسى الاخوان وانسى محمد ابراهيم سليمان وانسى ان حد من 0900 يطلع كسبان وانسى انى مديون وانسى ان كل واحد بيعتدى على كنيسه بيطلعوه مجنون وانسى كل ممثله حيزبون بتاخد فى المسلسل كام مليون وانسى ايامنا السوده واحضان طنطاوى والبابا شنوده وانسى القذافى والبشير وانسى كل ملك وكل امير اللى حاكمين من سنين من غير تغيير وعلشان اعرف ان الصنف كويس لازم ارشح نفسى وابقى الريس وفى اخر كلامى انا مش مسئول ده كله كلام بيطلع والايد هيا السبب سيبوها تكتب وتكتب علشان الزهق خلاص ملينا منه وقرفنا بصحيح وهيا لما تكتب مش بتعرف تفرق بين الشرب والنسيان والترشيح انت كمان لازم تشرب علشان تنسى انسو بقى ايام زمان ايام جدى وجدك وسيتى وسيتك ساعتها بس مش هانشرب وهانعيش وهانفوق من الغيبوبه ونرفع راسنا لفوق تحياتى للجميع اشرب عالورق بس مش بصحيح |
ههههههههههههههه شكرا استاذ قلب الاسد على موضوعك
|
ههههههههههههههه جميلة ياقلب الأسد والله ياسيدي الناس مسطولة من غير حشيش
أبيات معبرة عن واقعنا المرير شكراً لك |
الساعة الآن 11:21 AM. |
Powered by vBulletin® Version 3.8.12 by vBS
Copyright ©2000 - 2024, Jelsoft Enterprises Ltd.
جميع المشاركات والمواضيع بالمنتدى تعبر عن وجهة نظر كاتبها ولا تعبر بالضرورة عن وجهه نظر الموقع
الموقع برعاية الشركة المصرية لتطبيقات الانترنت